نصيحة لكل متزوجة او مقبلة على الزواج

للإفادة

نصيحة لكل متزوجة او مقبلة على الزواج

انا واحدة منكم مزوجة خدامة و عندي وليدات ممكن تسموني الفيلسوفة هههه من خلال هاد البوسط بغيت نوصل ليكم سيداتي و انساتي مجموعة من الخلاصات و القرارات للي تخدتهم فحياتي و نفعوني لقيت بفضل ديالهم الراحة لا فعلاقتي مع الزوج ديالي و لا الاهل و الناس ككل، نتمنى نفيدكم و نكون خفيفة على قلبكم قراو و ردو عليا الخبار ايلا عجبوكم هاد النصائح دعيو معيا بتسيير الامور و ان شاء الله نجتهد و نزيدكم :

-تعلمت الى بغيت شي حاجة نطلبها مرة و 2و 3 هاديك ديال نتسنى الزوج حتى يفهم راسو ولا يتفكر عيد ميلادي مكيناش، الرجال مكيفهموش بوحدهم و لا بالمعنى والو والى فهم العامين الاولى ديال الزواج منبعد كيولي الى جاب التقدية للدار راه باركا اذن من نستحيش من راجلي و نطلب منو لبغيت،

-تعلمت الى كنت مريضة نشد الفراش و ندلل عليه جيب ليا عطيني، هديك القضية ديال نمرض ونبقا نكابر و واقفا فالكوزينة مكيفهموهاش كتجيهم غير كتكدبي ماشي كيفهموها تضحية و نكران الدات،

-تعلمت فلوسي فلوسي وفلوسو فلوسو الحساب المشترك رفضتو من نهار الاول و من بعد حمدت الله على هاد القرار، كنعاونو بلي قدرت فمصاريف الاولاد و الدار و الباقي حرة فيه نخسرو كيف بغيت و فلوسو بالمثل غمضت عيني عليهم يعطي لدارهم لي بغا. ندير علاش نرجع و منخليهش يطمع فاملاكي، اجي تشركي معيا مكتعجبنيش صراحة، الواحد يدير حساب الخايب قبل الزين غادي تقولو الواحد يدير النية, النية مشات مع الرجال ديال زمان. دبا راه كاين فكل الشركات الكبار مفهوم ديال تقييم المخاطر ( analyse de risque et cartographie des risques) والزواج راه بحال المشروع فيه مخاطرة خصني نحاول الى كتاب و فشل نخرج باقل الاضرار ممكنة ادن فالاول نجلس مع راسي و نختار الوضع لي غادي يريحني.

-نتهلا فراسي و نكون انانية و خا مكينش الوقت ندير لاصال و نخليه شاد الدراري كيفما هو تابع الماتشات فالقهاوي حتى انا ناخد ساعتين و نمشي نفوج على راسي، نهار لكتبداي تفرطي فراسك على قبل الدار و الاولاد مكيرحمكش اصلا انت راسك و مبقاش فيك كتفرطي فيه كيفاش بغيتي تبقاي فيه؟

-نشقا فالدار على قد جهدي الشقا مكيتقداش و نحاول على قدر المستطاع نجيب لي يعاوني و منكونش مهوسة بالشقا اصلا الدار كتجمع فساعتها كترون

-اسراري و اسرار دارنا في بير غارق منعاودهمش ليه

- عائلة الزوج من نهار الاول التيقار و قلة الجماعة هديك نبقا غير كنضحك و نهدر باش نعجبهم غير حيديها من راسك، السؤال لمعجبنيش منجاوبش عليه، انا غير ملزمة نعطي تقرير على حياتي و الخصوصية راها ضرورية

-انا ضد الفكرة ديال لكتزوج و كتحمل بيه فيه، الوحدة تخلي مدة عامين حتى تفاهم مع الراجل يسافرو و من بعد تولد شخصيا انا ولدت 4 سنين بعد الزواج و باستعمال موانع الحمل و الام ديالو عيات بالاسئلة و الهدرة لكن درت لي فراسي هدا الجسد ديالي و انا لي نختار الوقت ماشي يتفرض عليا،

-المعاشرة الجنسية خصها تكون على اساس رابح-رابح (gagnant-gagnant) الحشمة خليها فدار باباك هو لي خاصك تحشمي منو اما الزوج ديالك فكيربطك بيه عقد نكاح ما شي عقد ميناج و لا عقد اولاد ... نكون منفتحة فالعلاقة نقرا نسول نمشي عند الطبيب المختص ايلا كان مشكيل و يكون الحوار بيني و بين الزوج ديالي، و ردو البال العلاقة الجنسية هي كلشي فالزواج وb الراجل طبعو السكات مكيتحاورش و كيبقى يجمع و عند راسو راه صابر (و هو طرف فالمشكل) كيبدى يتعصب و يغوت على اقل سبب،

-الايجابية فالحياة : بمعنى منخليهش يكون هو محور حياتي نكون انا محور حياتي، نقرا نطور راسي الكتب عطاهم الله نبدا بكتب التنمية الداتية و التاريخ و علم الاجتماع نتقف راسي، نتفرج فافلام (الفراجة فيها و فيها نبعد من bas de gamme)، ندير صحبات بنات ما شي بالضرورة ديك الصحبة ديال تدخل فيا نتدخل فيك، صحبة تكون ديال نتلاقاو نشبعو ضحك و من بعد كلا و حالها منلومها ما تلومني، نخرج ندير لامارش، نتعلم صنعة بالنسبة للبنات اللي مخدماتش الخياطة راها فن و شحال ديال الكروبات كيبداو كيعلمو من الصفر ، الحلوة ...

- الاطفال نعلمهم المسؤلية يعولو على روسهمو يعاونوني على قد جهدهم و نساوي ما بين الولد و البنت ماشي نلوم راجلي مكيعاونيش و نربي ولادي بحال حماتي،